Exo 30 | ZomZIV | STEP | “Gimnamtui hal nadingin singkha singin biakna-tau khat dawh in.

Exodus 30

Gimnamtui Biakna-tau

1 “Gimnamtui hal nadingin singkha singin biakna-tau khat dawh in. 2 A ningkim hi dinga, tong khat asau, tong khat azai, tong nih a sang ^{▼▼30.2 Tua pen pi 1 ½ bang (meter 0.5 bang) sau in zai a, pi 3 bang (meter 0.9 bang) sang hi.} - a kite a tau tawh sakhat hi ding hi. 3 Atung, apangte le a kite kham citaktui luan inla, a kimkotah kham geihual neisak in. 4 A geihual nuai-a bulh dingin kham kual nih - apang tuakah nih - a zawnna zawlte khumna vanga zat dingin bawl in. 5 Singkha zawl sui inla khamtui luan in. 6 Tecipanna tung sana thoihdamna sin mai - Tecipanna singkuang mai-a puanzak mai - nang tawh i kituah nading munah biakna-tau koih in.

7 “Aaron in zingsang sima meivakte a puah ciangin biakna-tau tungah gimnamtui a hal pelmawh ding hi. 8 Amah in khang sawnsawnte donga TOPA mai-ah gimnamtui maanmaana a kihal theih nadingin nitak khuamui-a mei a vak ciangin gimnamtui a hal kik ding hi. 9 Hih biakna-tau tungah gimnamtui dang peuhmah ahikeh meihal biakna khatpeuh ahi-a, an-a biakna ahi zongin pia loin tua tungah dawntheih biakna na sung kei ding hi. 10 Aaron in tua biakna-tau kite tungah kum khatin khat vei thoihdamna a bawl ding hi. Khang sawnsawn dongin kumsim in hih mawhna hanga biakna sisan tawh thoihdamna kibawl pelmawh ding hi. Tua in TOPA tungah a siangtho pen ahi hi,” a ci hi.

Thoihdamna Sum

11 Tua ciangin TOPA in Moses tungah, 12 “Israel mite kisim dinga misimna na bawl ciangin mikim in amah a kisim hun ciangin ama nuntakna a tatna TOPA a pia pelmawh ding hi. Tua hi a amaute na sim ciangin amau tungah pulpi a tung kei ding hi. 13 A kisimsate lak-a a pai peuhmah in biakbuk shekel ^{▼▼30.13 Tua pen, ounce 1/5 bang (gram 6 bang); tg. 15 ah zong} tawh kizui-in gerah sawm nih a gik shekel lang a liau ding uh hi. Hih shekel lang pen TOPA tungah biakna ahi hi. 14 A kisimsa khempeuh kum sawmnih le a tungsiah-te in TOPA tungah biakna a pia ding hi. 15 Na nuntakna tatna-a TOPA tungah biakna na piak uh ciangin a haute in shekel lang sanga tamzaw pia lo dinga, a zawngte in a tawmzaw a pia kei ding uh hi. 16 Israel mite tung panin tua thoihdamna sum sang inla Kikhopna Puanbuk-a nasep nadingin zang in. Tua thoihdamna pen na nuntakna uh tatna Israel-te adingin TOPA mai-ah, a tawntunga phawkna hi ding hi,” a ci hi.

Kisilna Kuangpi

17 Tua ciangin TOPA in Moses tungah, 18 “Kisil nadingin sumngo kuangpi khat le a tunna sumngo in bawl in. Tua pen biakna-tau le Kikhopna Puanbuk kikalah koih inla a sungah tui koih in. 19 Aaron le a tapate in tua lai-ah a khut le a khete uh a sil ding uh hi. 20 Kikhopna Puanbuk sungah a lut ding simun amaute a sih loh nadingun tui-in a kisil ding uh hi. Amaute in TOPA tungah mei-a biakna nasep khat pia dingin biakna-tau a naih uh ciangin 21 amaute a sih loh nadingun a khut a khete uh sil ding uh hi. Hih in Aaron le a suan a khak khang sawnsawnte adingin a kip den thuzek hi ding hi. ^c

Nilh Sathau

22 Tua ciangin TOPA in Moses tungah, 23 “A nuai-a a namtui hoihte: pak namtuikha, tui shekel ^{▼▼30.23 Tua pen, pound 12 ½ bang (kilogram 6 bang)} 500, singguithak namtui tua zah lang (tua pen shekel 250), kawltu namtui shekel 250, 24 thaksiing namtui shekel 500 - a vekpi in munsiangtho shekel-a teh - le olive thau hin ^{▼▼30.24 Tua pen quart 4 bang ( litre 4 bang )} khat la in. 25 Nangmah in hihte paknamtui bawlte bawl bangin a namtui dingin nilh sathau siangtho-in bawl in. 26 Tua ciangin tua tawh Kikhopna Puanbuk, Tecipanna singkuang, 27 sabuai le a vanzat teng, meivak tunna le a nazat teng, gimnamtui halna biakna-tau, 28 meihal biakna-tau le a vanzat teng le kuangpi le a tunna zut in. 29 Tuate a siangtho pen ahi dingin na siansuah dinga, tuate a sukhate peuhmah a siangtho ding uh hi. ^f

30 “Aaron le a tapate in ka siampi na a sep theih nadingun sathau nilh inla amaute siansuah in. 31 Israel-te kiangah, ‘Hih in khang sawnsawnte dongin ka nilh sathau siangtho ahi hi. 32 Mihing pumpi tungah sung kei inla, a helkhawm zia kibang sathau dang bawl kei in. Tua in a siangtho hi; a siangtho-a na neih ding ahi hi. 33 Tua tawh kibang paknamtui a bawl peuhpeuh siampite simloh midang tunga a zang peuhmah a mipihte panin kikhenkhia ding hi,’ ci in,” a ci hi. ^g

Gim-namtui

34 Tua ciangin TOPA in Moses tungah, “A gim namtui - singnai kaw, onycha le galbanum le paknamtui citak a vekin a kikim la inla 35 paknamtui bawlte bawl bangin a namtui-in bawl in. Ci kisawh dinga bangmah dang hel loh a siangtho ahi ding hi. 36 Tua tawmkhat gawivui inla Kikhopna Puanbuk sunga Tecipanna mai, nang tawh i kituah nading munah koih in. Tua in nang tungah a siangtho pen hi ding hi. 37 Nang mahmah in hih bang helzia tawh kibangin a namtui dang bawl kei in; TOPA tungah a siangtho-in nei in. 38 Namtui a sak dinga tua tawh kibang a bawl mi peuhmah a mipihte panin kikhenkhia ding hi,” a ci hi.